Tungkol sa patakarang ito. Ipinapaliwanag ng patakarang ito kung paano gumagana ang aming mga unlimited na data package at kung paano mo dapat gamitin ang mga ito. Nalalapat ito sa lahat ng unlimited na data package na available sa pamamagitan ng aming website, platform at app. Ang patakarang ito ay dapat basahin kasama ng aming Pangkalahatang Mga Tuntunin, ang aming Mga Tuntunin sa Paggamit para sa aming Mga Serbisyo at ang aming Patakaran sa Katanggap-tanggap na Paggamit. Kapag sinabi naming “Airalo”, “kami”, “amin” o “namin”, ang ibig naming sabihin ay AirGSM Pte Ltd, isang kumpanyang nakarehistro sa Singapore sa 6 Raffles Blvd, #03-308 Marina Square, Singapore 039594. Sa pamamagitan ng pagbili o pag-activate ng unlimited na data package, sumasang-ayon kang sumunod sa patakarang ito.

Paano ko magagamit ang aking unlimited na package? Ang aming mga unlimited na data package ay idinisenyo para sa personal at hindi pangkomersyal na paggamit. Puwede mong gamitin ang iyong package para sa mga pang-araw-araw na aktibidad tulad ng pag-browse, pag-stream, pag-message, pag-video call at social media. Puwede mo ring gamitin ang iyong device bilang personal hotspot para i-share ang koneksyon mo sa ibang device. Walang limitasyon sa pag-tether o sa bilang ng mga device na ikokonekta mo.

Ano ang ibig naming sabihin sa “unlimited”? Sa aming mga unlimited na data package, walang nakatakdang kabuuang limitasyon sa data. Gayunpaman, para panatilihing patas ang pagtakbo ng network para sa lahat, kapag nakagamit ka na ng mahigit 3GB sa isang araw, pababagalin (o “ita-throttle”) namin ang bilis ng iyong internet sa 1 Mbps para sa natitirang bahagi ng araw na iyon. Awtomatikong maibabalik ang iyong buong high-speed na koneksyon kapag nag-reset ang iyong pang-araw-araw na allowance. Nagre-reset ang iyong pang-araw-araw na allowance kada 24 na oras, simula sa oras na na-activate mo ang iyong eSIM.

Ang default na pang-araw-araw na threshold ng high-speed data ay 3GB. Kung may ibang nalalapat na threshold, malinaw itong itatakda sa mga detalye ng package bago ka bumili. Para sa mga layunin ng patakarang ito, ang ibig sabihin ng "araw" ay kada 24 na oras na yugto na magsisimula kapag na-activate mo ang iyong eSIM at magre-reset kada 24 naoras mula sa oras ng pag-activate na iyon, gaya ng tinukoy sa mga detalye ng iyong package.

Ang aming mga unlimited na package ay idinisenyo para sa personal na paggamit. Hindi nilayon ang mga ito para sa tuloy-tuloy o 24 na oras na pagkonsumo na iniuugnay sa mga automated na system, mga server, o iba pang machine-to-machine na paggamit. Kung umabot ang iyong kabuuang paggamit sa buong itatagal ng package sa isang antas na hihigit sa kung ano ang makatwirang makokonsumo ng isang tao sa karaniwang personal na paggamit, puwede naming suspindihin, paghigpitan, o ihinto ang koneksyon para protektahan ang network at maiwasan ang maling paggamit, gaya ng itinakda sa seksyong "Mga paglabag sa patakarang ito" sa ibaba.

Ano ang magagawa ko sa 1 Mbps? Sa 1 Mbps, puwede ka pa ring magpadala at makatanggap ng mga mensahe, mag-browse ng mga simpleng web page, gumamit ng mga mapa para sa pag-navigate at gumawa ng mga video call na mas mababa ang kalidad. Magiging mas mabagal ang mga aktibidad na malakas sa data tulad ng video streaming, gaming o pag-download ng malalaking file hanggang sa mag-reset ang iyong bilis.

Mga bagay na hinihiling naming huwag mong gawin. Para protektahan ang network at panatilihing patas ang aming serbisyo para sa lahat ng user, hindi pinahihintulutan ang mga sumusunod na paggamit ng unlimited na data package:

1. pag-resell, pag-redistribute o komersyal na pag-share ng koneksyon ng data sa mga third party;
2. pagpapagana sa koneksyon ng data sa isang hindi binabantayan, naka-automate o machine-to-machine na pamamaraan, kabilang ang sa pamamagitan ng mga SIM farm, auto-dialler, bulk messaging system o mga katulad na naka-automate na tool;
3. paggamit sa koneksyon ng data sa paraang hindi makatwirang nagpapabagal o nagpapasikip sa network para sa iba pang mga user (hal., tuloy-tuloy na pag-upload o pag-download ng malalaking file nang mabilis sa mahabang panahon, pagpapagana ng mga peer-to-peer file sharing application, pag-host ng web o game server);
4. paggamit sa koneksyon ng data para sa anumang layunin na labag sa batas o paglabag sa naaangkop na batas; at
5. pagtatangkang iwasan o pahinain ang anumang hakbang sa pamamahala ng network na inilapat sa ilalim ng patakarang ito.

Kikilos kami nang makatwiran sa pagpapasiya kung ang isang partikular na paggamit ay napapaloob sa mga nasa itaas.

Pamamahala ng network. Ang mga network na nagpapagana sa aming mga package ay posibleng maglapat ng pamamahala sa trapiko sa mga abalang oras. Puwede itong magresulta sa pagbagal na hiwalay sa pang-araw-araw na 3GB threshold na inilarawan sa itaas, at wala sa direktang kontrol ng Airalo. Walang ibinibigay na warranty ang Airalo patungkol sa bilis, kalidad o availability ng koneksyon sa anumang partikular na oras.

Mga paglabag sa patakarang ito. Kung may makatwiran kaming basehan para maniwalang gumagamit ka ng unlimited na data package sa paraang lumalabag sa patakarang ito, puwede naming gawin ang mga sumusunod, nang walang paunang abiso:

1. suspindihin o paghigpitan ang access sa iyong package at Airalo account;
2. wakasan ang iyong package nang walang refund; o
3. gumawa ng anumang iba pang hakbang na itinuturing naming makatwirang kinakailangan para maprotektahan ang network at ang iba pang user.

Ang paglabag sa patakarang ito ay paglabag rin sa aming Patakaran sa Katanggap-tanggap na Paggamit at Pangkalahatang Mga Tuntunin, at ang mga solusyong available sa amin sa ilalim ng mga dokumentong iyon ay malalapat.

Pangkalahatan. Puwede naming i-update ang patakarang ito paminsan-minsan. Aabisuhan ka namin tungkol sa mahahalagang pagbabago alinsunod sa aming Pangkalahatang Mga Tuntunin. Magkakabisa ang mga pagbabago mula sa petsa ng pag-publish at malalapat sa mga package na binili sa o pagkatapos ng petsang iyon.

Ang patakarang ito at ang anumang alitan o paghahabol na magmumula rito o kaugnay nito ay pamamahalaan at bibigyan ng kahulugan alinsunod sa mga batas ng England at Wales. Ang mga korte ng England at Wales ay magkakaroon ng eksklusibong hurisdiksyon sa anumang alitan o paghahabol.